ARESTADO ang dalawang menor-de-edad na mga estudyanteng suspek sa pamamaril sa San Jose National High School sa Tacloban City ilang oras matapos ang insidente na nangyari kaninang umaga pagpasok ng mga mag-aaral.
Tatlong estudyante, isang lalaki at 2 babae, ang nasawi habang 13 naman ang sugatan sa pamamaril at inaalam pa ng mga otoridad kung saan nakuha ng mga suspek ang ginamit na baril na isang revolver at isang pistola.
Panoorin ang video sa pamamagitan ng pag-click sa link na ito.
Ayon sa ilang ulat, nag-post pa muna umano ang mga suspek sa social media ng mga baril na gagamitin at tila ipinagyayabang pa ng mga ito.
Lumilitaw na nagtanim umano ng galit ang mga suspek dahil sa pambu-bully, ayon sa PNP Public Information Office Acting Chief na si PCol. Allen Rae Co sa isang press briefing.
Mariin namang kinondena ng mga opisyales ng Tacloban ang marahas na insidente at tiniyak sa kaanak ng mga biktima na maglalaan ng tulong ang lokal na pamahalaan sa iba’t ibang paraan.
Kasama sa tulong ang psychosocial aid upang tulungan ang mga biktima na malampasan ang sikolohikal na epektong idinulot ng nasabing insidente.
Kinumpirma ng mga otoridad na isang pulis ang tiyahin ng isa sa dalawang menor-de-edad na estudyanteng suspek kung saan ang inisyu na Glock 9mm service firearm ay ginamit umano sa pamamaril.
Isinailalim na sa custodial investigation ang nasabing policewoman at inaalam kung paano napasakamay ng estudyanteng suspek ang baril ng tiyahin.
Suspendido ang mga klase sa nasabing eskuwelahan habang patuloy na nagsasagawa ng imbestigasyon ang mga otoridad.
Samantala, mula Hunyo 24 hanggang Hunyo 26 isasailalim sa Psychological First Aid (PFA) sessions ang mga guro, kawani at mag-aral na nakasaksi sa insidente na nagdulot ng trauma sa marami.
Agad namang nagpadala ng pakikiramay ang pamunuan ng Department of Education (DepEd) sa mga naulila ng limang napaulat na namatay at sugatan sa nasabing insidente.
Kasunod ng insidente, idineklara ng Department of Education Tacloban City Division na suspendido muna ang mga klase sa San Jose National High School, San Jose Central School at Manlurip Elementary School.
Nakadepende ang pagbabalik ng klase depende sa rekomendasyon ng mga eksperto sa education at mental health matapos ang isinasagawang PFA sessions.
Ihahatid namin ang iba pang detalye sa ulat na ito sa oras na makakuha kami ng karagdagang impormasyon.
