INILATAG n ani San Juan City Mayor Francis Zamora ang mga paghahanda ng pamahalaang lungsod sa nalalapit na Wattah Wattah Festival batay sa isinagawang press conference kaninang umaga.
Ayon kay Zamora, tinukoy na nila ang mga “Basaan zones” at plantsado na rin ang pagtatalaga ng 400 tauhan ng San Juan City Police Station sa araw ng kapistahan sa Hunyo 24.
Sinabi pa ng alkalde na tulad noong nakaraang taon, target din ng lokal na pamahalaan na mapanatili ang “zero violators” dahil binigyang-diin nila ang mahigpit na pagpapatupad ng liquor ban.
“Gagawin namin ang lahat upang maging mapayapa at masaya ang Wattah Wattah Festival tulad noong nakaraang taon. Hindi tulad noong 2024 kung saan nakilala ang San Juan sa isang viral video kaugnay sa tradisyunal na basaan,” ang pahayag ni Zamora.
Matatandaan na naging kontrobersyal ang nasabing kapiyestahan nang marami ang nagreklamo kaugnay sa walang pakundangang pambabasa sa mga dumadaan, alinman patungo sa trabaho o eskuwelahan.
Dahil dito, napuno ang social media ng negatibong mga komento na sa panahon ngayon ay nakaka-perhuwesyo na ang tradisyunal na basaan at nakakaabala na sa marami maliban pa sa nasisirang mga gadget kapag nabuhusan ng tubig at minsan ay nauuwi pa sa gulo.
Inanunsyo ni Zamora na magsisilbing “basaan zone” ang kahabaan ng Pinaglabanan Road sa pagitan ng N. Domingo Street at P. Guevarra Street, mula alas-7 ng umaga hanggang alas-2 ng hapon.
Ipapatupad din ang liquor ban alas-12:01 ng madaling araw hanggang alas-2 ng hapon sa mismong araw ng kapistahan.
