PATAY ang isang ginang at sugatan naman ang isa sa dalawang anak nito sa nangyaring di-umano’y pangho-hostage ng asawang lalaki alas-11:30 ng umaga sa Sta. Isabel Subdivision, Havila, Brgy. Mahabang Parang, Angono, Rizal, Abril 4, 2026.
Ayon sa inisyal na impormasyon ng mga otoridad, patay na ang biktimang babae nang matagpuan ng mga pulis sa kanilang bahay kaninang umaga.
Kinilala ni PCol. Eleazar Barber, provincial director ng Rizal Provincial Police Office (Rizal PPO), ang biktima na si Ma. Lourdes Santos, anak nitong sugatan na si alyas Dwyane, 15 at kapatid nitong si alyas Kyle, 12, walang pinsala.
Batay sa report, sinaksak umano sila ng suspek na si Jeremy Santos na ama at asawa ng mga biktima sa hindi pa malamang dahilan.
May alegasyon na ginilitan sa leeg ang asawang biktima at nagsaksak din sa sarili ang suspek na parehong hindi pa kinukumpirma ng mga otoridad.
Nang pumasok sa loob ng bahay ang mga pulis, natagpuan din nila ang asawang lalaki na nakahandusay sa banyo na naghihingalo at kaagad na isinugod sa ospital.
Pinaniniwalaang problema sa pinansiyal ang ugat ng nasabing insidente, batay na rin sa pakikipag-usap ng mga otoridad sa mga kamag-anak ng suspek at mga biktima.
Sasampahan ng mga kasong parricide, frustrated parricide at attempted parricide ang suspek na inihahanda na para ihain sa Rizal Provincial Prosecutor’s Office.
Ihahatid namin sa inyo ang karagdagang impormasyon sa nasabing insidente. (Knots Alforte via Manila East TV-FB)
