TUMATAGINTING na ₱680,000 halaga ng pinaghihinalaang shabu ang nasamsam mula sa tatlong itinuturing na high value individuals (HVI) sa isinagawang buy-bust ng Cainta Municipal Police Station (Cainta MPS), madaling araw ng Hunyo 2, 2026.
Kinilala ni PCol. Eleazar Barber Jr, provincial director ng Rizal Provincial Police Office (Rizal PPO) ang mga nahuling suspek na sina alyas “Dan,” 33, alyas “John,” 29 at alyas “Ian,” 53 sa ikinasang operasyon sa Brgy. San Andres, Cainta, Rizal.
Batay sa ulat, isinagawa ng Station Drug Enforcement Team (SDET) ng Cainta MPS ang operasyon na may koordinasyon sa Philippine Drug Enforcement Agency (PDEA), na nagresulta sa pagkakaaresto ng tatlong sangkot umano sa bentahan at paggamit ng ilegal na droga sa nasabing lugar.
Nakumpiska ang siyam na piraso ng pakete na naglalaman ng hinihinalang shabu na may kabuuang timbang na humigit-kumulang 100 gramo at narekober din ang isang pouch, marked-money, at perang hinihinalang mula sa ilegal na transaksyon.
Nasa custodial facility na ng Cainta MPS ang mga suspek habgn inihahanda ang pagsasampa ng mga kasong paglabag sa Sections 5 at 11, Article II ng Republic Act 9165 o Comprehensive Dangerous Drugs Act of 2002.
