NATUPOK ang isang tindahan ng mga paputok limang minuto pagkatapos salubungin ang bagong taon sa Sumulong Football Field, Brgy. Dela Paz, Antipolo City, Enero 1.
Sa inisyal na imbestigasyon na inilabas ng Rizal Provincial Police Office, nagsimula ang sunog nang mag-malfunction ang isang aerial firework na ginamit sa pagdiriwang ng New Year.
Ayon pa sa report, natumba umano ang paputok sa halip na lumipad pataas, kung kaya sumabog ito sa ibaba at nasunog ang kalapit na tindahan dahil mabilis na kumalat ang apoy.
Pitong minuto lang ang tinagal ng nasabing sunog dahil sa mabilis na pag-responde ng mga bumbero at iniulat sa Antipolo Component City Police Station dakong ala-1:30 ng umaga matapos ang imbestigasyon.
Walang iniulat na nasaktan sa nasabing insidente.
