ARESTADO ang isang lalaki sa loob lamang ng 36-oras matapos ang agarang follow-up investigation at hot pursuit operation hinggil sa panghahalay at pagpatay sa isang lola sa Morong, Rizal.
Ayon kay PCol. Eleazar Barber, provincial director ng Rizal Police Provincial Office (Rizal PPO), nangyari ang krimen sa isang madamong lugar noong madaling araw ng Mayo 18, 2026.
Batay sa imbestigasyon, huling nakitang magkasama ang 67-anyos na biktima at ang 29-anyos na suspek habang nag-iinuman kasama ang asawa at anak na lalaki ng biktima bago nagkaroon ng mainitang pagtatalo.
Dagdag pa ng mga pulis, sinuntok ng suspek na si alyas Jay at nawalan umano ng malay ang asawang lalaki kasunod ng pagkaladkad nito sa biktima sa madamong lugar malapit sa bahay.
Alas-4 ng madaling araw nang magising ang asawang lalaki, hinanap ang asawa at natagpuan ito na may matinding pinsala sa ulo at walang suot na pang-ibaba na hinihinalang ginahasa muna bago pinatay.
Sa pinagsanib na pwersa ng Morong Municipal Police Station at Binangonan Municipal Police Station at sa tulong ng social media post at mga concerned citizen, mabilis na natukoy ang pinagtataguan ng suspek sa bayan ng Binangonan.
Hindi na nakapalag pa nang posasan ang suspek sa karumal-dumal na panggagahasa at pagpatay sa biktima nang matunton ito noong Mayo 19, 2026.
Kasalukuyang nakapiit ang suspek sa custodial facility ng Morong PNP habang inihahanda ang kaukulang mga dokumento para sampahan ng kasong rape with homicide.
