DALAWANG bagong komisyoner ng National Commission on Muslim Filipinos (NCMF) ang itinalaga ni Pangulong Ferdinand Marcos Jr na tubong Maguindanao bilang tugon sa pantay na representasyon ng mga etnikong grupo na bubuo sa ahensya.
Pinangunahan ni Commissioner Sabuddin Abdurahim, na nagsisilbi ring kalihim ng komisyon, ang magkahiwalay na panunumpa nina Hadji Usop “Joe” Zaide Kasan at Atty. Syed Kamal Reza Ampatuan mula sa lalawigan ng Maguindanao del Sur, noong Hunyo 9, 2026, na sinaksihan ng kani-kanilang pamilya.
Dating Director ng Bureau of Pilgrimage and Endowment (BPE) si Kasan sa ilalim ng binuwag na Office on Muslim Affairs (OMA) samantalang si Atty. Ampatuan naman ay isang bagong abogado at anak ni Department of Agriculture (DA) Undersecretary for Bangsamoro Concerns Zamzamin Ampatuan, na dati ring executive director ng OMA.
Sa kasalukuyan, pang anim at pang pito na sina Kasan at Ampatuan na komisyoner matapos italaga kamakailan ang 2 pa kapuwa mula sa lalawigan ng Lanao at 2 rin mula sa Western Mindanao (Region 9) kaya dalawang upuan pa ang bakante para makumpleto ang siyam na hinihiling na bubuo bilang kinatawan ng lupon.
“Ang okasyong ito ay isang mahalagang milestone sa higit pang pagpapalakas ng pamumuno ng Komisyon at pagsusulong ng mandato nitong itaguyod at protektahan ang kapakanan, karapatan, at interes ng mga Muslim na Pilipino sa buong bansa,” ang opisyal na pahayag ng NCMF.
Ang inklusibong pag-unlad at ugnayan sa komunidad na mga programa ang gagampanan ni Kasan samantalang kapakanan naman ng kabataang Muslim ang isusulong ni Ampatuan maliban sa pagiging kinatawan ng sektor ng kabataan sa pamahalaang Bangsamoro.
Bagama’t hamon ang pagpapanatili sa interes ng kanilang tribu, inaasahan ng mga tagamasid na malaki ang magiging kontribusyon ng dalawa sa ikasusulong ng Bangsamoro Autonomous Region in Muslim Mindanao (BARMM) sa kabuuan.
Batay sa ulat, wala pa umanong Kalihim o pinuno ng ahensya mula sa kanilang tribu ang naupo o naitalaga mula nang maitatag ang NCMF noong 2010 sa ilalaim ng Republic Act 9997 kung kaya limitado lamang ang naging mga kawaning Maguindanaon sa Central at Regional Offices, maliban na lang sa Cotabato City.
Pinasasalamatan ng mga Maguindanaon ang inisyatiba ni Minister Jordan S. Bayam ng Ministry of the Interior and Local Government (MILG-BARMM) upang isulong ang pagtatalaga kina Kasan at Ampatuan.
