Kalaboso ang tatlong lalaki matapos mahulihan ng ₱170,000 halaga ng shabu sa isinagawang buy bust operation kaninang madaling araw sa Quezon City.
Kinilala ang mga suspek na sina Gahmad Apiran, 21-anyos, Larry Pulido, 43-anyos at Joemar Janapin, 30-anyos, pawang mga residente ng Barangay Culiat, Quezon City.
Matapos makatanggap ng tip mula sa isang concerned citizen kaugnay sa kanilang illegal drug activities, nagkasa ng buy bust operation ang mga tauhan ng Project 4 Police Station, sa pangunguna ni PLtCol. Jake Barila, sa kahabaan ng P. Burgos Street, Brgy. Escopa 3, Project 4, na nagresulta sa pagkakaaresto sa mga suspek.
Nakuha mula sa tatlo ang 25 gramo ng shabu na nagkakahalaga ng ₱170,000, isang coin pouch, dalawang cellular phones, at ang buy-bust money.
Nakakulong na sa QC custodial facility ang mga suspek at kinasuhan ng paglabag sa R.A. 9165 o Comprehensive Dangerous Drugs Act of 2002.
