Kulungan ang bagsak ng dalawang lalaki na sangkot sa ilegal na pagbebenta ng baril sa isinagawang entrapment operation ng pulisya sa Caloocan City, kamakalawa ng gabi.
Nahaharap sa kasong paglabag sa Section 32 o Unlawful Manufacture, Importation, Sale or Disposition of Firearms or Ammunition at Section 28 Unlawful Acquisition, or Possession of Firearms and Ammunition ng R.A. 10591 o ang Comprehensive Law on Firearms and Ammunition in relation to Omnibus Election Code ang mga naarestong suspek na sina alyas “Rodolfo”, 62-anyos, technician, residente ng Brgy., 135, at alyas “Edilberto”, 45-anyos, jeepney driver ng Brgy., 145, kapwa ng Bagong Barrio, Caloocan City.
Sa kanyang ulat kay Northern Police District (NPD) Director P/BGen. Rizalito Gapas, sinabi ni Caloocan police chief P/Col. Ruben Lacuesta na bandang 11:20 ng gabi nang ikasa ng mga operatiba ng Intelligence Section (IS) sa pangunguna ni P/Maj. John David Chua, katuwang ang Regional Mobile Force Battalion at Northern NCR Maritime Police, ang entrapment operation laban sa mga sa C-3 Road, Brgy. 28.
Nang tanggapin ng mga suspek ang P15,500 marked money, kasama ang 15-pirasong P100,00 boodle money kapalit ng isang kalibre .45 pistola na may magazine na naglalaman ng dalawang bala ay agad na silang sinunggaban ng mga operatiba.
Bukod sa markadong salapi at ibinentang baril, nakumpiska rin sa mga suspek ang isa pang kalibre .38 revolver na kargado ng tatlong bala at cellular phone na gamit umano ng mga suspek sa ilegal na transaksiyon.
