INANUNSYO ng Department of Education (DepEd) na ipapatupad nila ang mid-school year wellness break para sa mga mag-aaral at mga guro mula Oktubre 27 hanggang Oktubre 30, 2025.
Ayon sa DepEd, layon ng inisyatibang ito na maglaan ng oras ang mga titser para makapagpahinga at isagawa ang In-Service Training (INSET) pagkatapos ng break.
Sinabi pa ni Education Secretary Sonny Angara na dapat mabigyan ng pagkakataon ang mga guro at mag-aaral na makapag-recover matapos sunod-sunod na nanalasa ang mga kalamidad kamakailan sa iba’t ibang bahagi ng bansa.
Idinagdag pa ni Angara na ang kautusang ito ay direktang galing kay Pangulong Ferdinand Marcos Jr. upang bigyang pansin ang kalusugan ng mga guro at estudyante matapos tumaas ang kaso ng trangkaso.
“Sa linggo-linggo nating pagbisita sa mga paaralan, naririnig namin ang panawagan ng ating mga guro. Minabuti na natin na mabigyan sila ng oras para magpahinga at magkaroon ng dagdag na oras kasama ang kanilang pamilya,” ang pahayag ni Secretary Angara.
“Marami sa ating mga guro at mag-aaral ang galing sa mga lugar na tinamaan ng bagyo at lindol o may mga kaso ng trangkaso. Kaya sabi nga natin, konting pahinga muna. Mas makakapagtrabaho tayo nang maayos kung maayos din ang pakiramdam natin,” dagdag pa ng kalihim.
Giit pa ni Angara, maaari umanong ilipat sa ibang petsa o gamitin para sa ibang aktibidad ng mga paaralan at dibisyong nakapagbayad na ng venue o pagkain para sa INSET sa panahon ng break.
Pero kung hindi ito posible, maaaring ituloy ang mga aktibidad sa boluntaryong paraan at ang mga guro na boluntaryong sasali ay hindi na kailangang dumalo sa katulad na pagsasanay sa ibang bahagi ng taon.
Ang INSET ay isang professional development program na tumutulong sa mga guro at school leaders na paunlarin ang kanilang kaalaman, kasanayan, at mga pamamaraan sa pagtuturo.
Sa pamamagitan nito, nananatiling handa at may bagong kaalaman ang mga guro sa mga reporma at inobasyon sa kurikulum upang mapaangat ang kalidad ng pagtuturo at pagkatuto.
Magbabalik ang klase sa Nobyembre 3, 2025, matapos ang paggunita ng All Saints’ Day at All Souls’ Day.
