MAY posibilidad umano na mabasura ang ethics complaint laban kay Senador Ronald dela Rosa sakaling magkusa siyang hindi na tumanggap ng sweldo at mga allowance habang absent pa rin siya sa Mataas na Kapulungan.
Ayon kay Ethics Committee chairman Senador JV Ejercito, ang pagtanggap ng sahod at allowances ang pangunahing dahilan ng reklamo laban kay Dela Rosa kahit hindi naman ito pumapasok.
Matatandaan na mula Nobyembre 2025 pa hindi pumapasok ang mambabatas dahil sa ugong-ugong na may nakahanda na umanong warrant of arrest dito mula sa International Criminal Court.
Sa panayam sa kaalyado nitong senador na si Robinhood Padilla, isa umano ito sa nagpayo kay ‘Bato’ na magtago na muna.
Ngunit binigyang-diin ni Ejercito na pagpapasyahan pa rin ito ng mga miyembro ng komite dahil ito umano ang pinakabuod ng reklamo laban sa senador.
“Di natin sinasabi, depends on the members, ako naman facilitator lang, ang miyembro magde-decide dahil yun ang basis ng complaint it might be basis for dismissal kasi kung ‘di nya na tatanggapin sahod nya, allowances so wala nang basehan ang complaint pero pag-uusapan pa ng members,” paliwanag pa ng senador.
Nanawagan naman kahapon si Ejercito kay dela Rosa na huwag nang tanggapin ang sweldo at allowances para maging payapa na ang isip ng senador.
Pakiusap ito ni Ejercito sa kaniyang kasamahan upang maging patas rin umano sa mga empleyado hindi lang ng senado kundi sa pangkalahatan na sumusunod sa patakaran na “no work, no pay.”
Ang isang senador ay may basic monthly salary mula ₱293,191 hanggang ₱334,059 batay sa Salary Grade 31 sa ilalim ng Salary Standardization Law.
Maliban sa sahod, may karagdagan ding buwanang allowances ang isang senador kapag miyembro ito ng isang komite at pang-operational expenses kaya aabot sa ₱400,000 hanggang ₱600,000 ang kabuuang “take-home” package ng isang senador.
