MAY kabuuang 811 Cebuanos ang naserbisyuhan ng Technical Education and Skills Development (TESDA) sa pamamagitan ng Kayang Kaya All-in-One Caravan na ginanap sa SM Seaside City mall sa Cebu City kamakailan.
Ayon kay TESDA Secretary Kiko Benitez, ito’y alinsunod sa direktiba ni Pangulong Ferdinand “Bongbong” Marcos, Jr. na palakasin ang workforce development, palawakin ang pagkakataon sa pagtatrabaho, at maghatid ng mga programang accessible, inclusive at employment-driven para sa mga Pilipino.
Ang nasabing one-stop event ay nagsilbi ring hub para sa skills development, certification, financial inclusion at employment services at upang gawing mas madali ang access sa mga programa ng pamahalaan mula training hanggang trabaho.
Sa 811 indibidwal na napagsilbihan, 364 ang nagparehistro sa TESDA Skills Passport na sumusuporta sa digitalization and streamlining of workers’ credentials.
Nagpa-enrol naman sa mga TESDA training programs ang 167 katao, kung saan 75 sa kanila ang dumalo sa training induction at 50 ang nakatapos ng kanilang training.
Sa assessment at certification, 10 ang sumailalim sa competency assessment at nakapasa para maging certified Computer Systems Servicing (CSS) o NC II holder.
Bahagi rin ang financial inclusion sa pagpapakilala sa Land Bank Piso Plus kung saan 52 ang nagbukas ng kanilang account para ma-access ang mga financial services na sumusuporta sa training at employment.
Para kay Ella Mae Gonzales, isang licensed teacher na kasalukuyang iskolar ng TESDA sa housekeeping, ang caravan ay isang hakbang palapit sa kanyang plano na magtrabaho sa ibang bansa.
“TESDA helps a lot of people. This is one of the requirements para makapag-abroad ako. To be honest, ito na lang ang kulang ko,” ayon sa kanya, kasabay ng pagpapasalamat sa libreng training. “One of the bridges to achieve my dream is TESDA.”
Samantala, ang job fair sa caravan ay binisita ng 77 aplikante, kung saan 14 ang near-hires at 2 ang hired on the spot (HOTS), na mas nagpapalakas pa sa training-to-trabaho pathway ng TESDA.
Isa sa kanila si Gilbert Wendell Felicilda mula sa Southern Leyte na nakakuha ng trabaho bilang production operator.
“Dahil na hire po nila ako, makakapag-ipon ako para sa pamilya ko. Malaking tulong ito sa mga nangangailangan ng trabaho,” ayon sa kanya.
Binigyang-diin naman ni Sec Kiko na ang tagumpay ng caravan ay nagpapatunay sa patuloy na commitment ng TESDA tungo sa skills development at mas accessible na employment opportunities sa bawat Pilipino.
“Hindi dapat pahirapan ang pagkuha ng skills at trabaho. Sa pamamagitan ng Kayang Kaya Caravan, pinapalapit natin ang lahat ng serbisyo sa mamamayan, mula training hanggang employment, para mas maraming Pilipino ang makinabang,” sabi ni Sec Kiko.
“Mas malinaw ang ating direksyon: training to trabaho. Hindi lang tayo nagtuturo ng skills—sinisigurado nating may patutunguhan itong disenteng trabaho at mas magandang kinabukasan,” dagdag pa ng kalihim.
Ang matagumpay na rollout ng Kayang Kaya All-in-One Caravan sa Cebu City ay bahagi ng patuloy na pagsisikap ng TESDA para palakasin ang technical education and training (TVET), palawakin ang access sa opportunities at tiyaking may mga trabahong naghihintay sa pamamagitan ng pagpapalakas ng ugnayan sa industriya at mga programang tumutugon sa pangangailangan ng industriya.
