NAGBABALA muli ang Manila Electric Company (Meralco) laban sa nagbabalak magnakaw ng mga materyales o kawad ng kuryente sa kanilang mga pasilidad.
Ito’y matapos masawi ang isang 34-anyos na lalaki na nagtangkang magnakaw ng kable ng kuryente madaling araw noong Abril 25, 2026 sa Brgy. Bahay Toro, Quezon City.
Dahil sa pangyayari, 6,000 kustomer ang naapektuhan, ngunit ayon sa kumpanya, agad namang naibalik ang serbisyo ng kuryente makalipas ang halos dalawang oras na pagkukumpuni.
Kaya muling nagpaalala ang Meralco na ang ganung uri na mga aktibidades ay lubhang mapanganib at labag sa umiiral na mga batas.
“Lubhang mapanganib at mahigpit na ipinagbabawal sa batas ang pagnanakaw ng mga pasilidad ng kuryente kagaya ng mga kable. Hinihikayat namin ang lahat na makipagtulungan sa pagpapanatili ng ligtas at maayos na serbisyo ng kuryente,” ang pahayag ni Meralco Vice President at Head ng Corporate Communications Joe R. Zaldarriaga.
Ayon pa kay Zaldarriaga, sa ilalim ng Republic Act No. 7832 o Anti-Electricity and Electric Transmission Lines/Materials Pilferage Act of 1994, ang pagnanakaw ng mga [materyales] sa mga pasilidad ng kuryente gaya ng kable ay may parusang hindi bababa sa 12 taon na pagkakakulong at multa mula ₱50,000 hanggang ₱100,000.
“Ang mga bumibili naman ng mga [ni]nakaw na mga [materyales] sa pasilidad ng kuryente ay mananagot sa ilalim ng Anti-Fencing Law at maaaring maparusahan ng pagkakakulong,” dagdag pa ni Zaldarriaga.
Maaaring i-report ng mga customer ang anumang kahina-hinalang aktibidad may kaugnayan sa mga pasilidad nito sa pamamagitan ng MyMeralco app, o sa mga opisyal na social media account sa Facebook (www.facebook.com/meralco) at X (@meralco).
Maaari rin silang magtext sa 09209716211 o 09175516211, o tumawag sa Meralco Hotline 16211.
