SINUSPENDI ng Department of Transportation (DOTr) ang pagdagdag ng mga bagong motorcycle taxi riders at transport network vehicle service (TNVS) drivers alinsunod sa limitasyon na ipinatutupad ng pamahalaan.
Sa isang memorandum na may petsang Abril 30, inutusan ni DOTr Secretary Giovanni Lopez ang Land Transportation Franchising and Regulatory Board (LTFRB) na sabihan ang mga kumpanya ng TNVS at motorcycle taxi na itigil na ang pagtanggap ng mga bagong drivers.
Ang mga kumpanya na may valid na mga prangkisa o provisional authority ay hindi kasali sa kautusang ito at pinapayagan na tumanggap ng bagong mga drivers.
Sakop ng kautusan na ihinto ang pagdagdag ay yaong karaniwang proseso sa pagtanggap gayundin ang mga on-the-spot at same-day onboarding activities, maliban na lang kung may patiunang aprubal mula sa LTFRB.
Ayon kay Lopez, pinaiimbestigahan aniya ni Pangulong Ferdinand Marcos Jr. kung bakit lumampas sa limit ang mga kumpanya sa pagtanggap ng mga drivers at riders at kung mapatunayan na may paglabag ay papatawan ng parusa.
Natuklasan ng DOTr na lampas na sa bilang ng mga drivers at riders nang nagsumite ng listahan sa Department of Social Welfare and Development (DSWD) ang mga kumpanya upang makakuha ng ayuda.
Sinabi ng DSWD na 185,000 ang isinumite ng mga ride-hailing companies’ para sa TNVS drivers at 293,000 naman na motorcycle taxi riders.
Giit ni Lopez, malayo ito sa pinapayagan sapagkat dapat aniya ay 78,000 na TNVS drivers at 45,000 naman na mga motorcycle taxi riders.
Dagdag pa ng kalihim, paparusahan ng ahensya ang kasalukuyan at dating mga opisyal ng DOTr at LTFRB sa pangyayaring ito.
