Hindi na pinalampas ni Mayor Kit Nieto ang talamak na problema ng ilegal na pagtatapon at pagkakalat ng basura sa kahabaan ng Ortigas Avenue sa Cainta, Rizal, partikular na sa tapat ng BF Metal.
Sa isang pahayag, binigyang-diin ng alkalde na bagama’t nauunawaan niya ang pagsusumikap ng ilan na maghanapbuhay, hindi ito sapat na dahilan upang magdulot ng perwisyo sa komunidad at sa kapaligiran.
Ayon kay Nieto, halos araw-araw niyang nasasaksihan ang mga indibidwal na naglalabas ng basura mula sa isang compound patungo sa bangketa.
Doon ay ikinakalat ang mga basura upang mamili ng mga gamit na maaaring ibenta, ngunit iniiwan naman ang mga tirang kalat sa daanan.
Dahil sa gawaing ito, napipilitan ang lokal na pamahalaan na magtalaga ng mga tauhan para maglinis, kahit sa araw ng Linggo, upang hindi magdulot ng masamang impresyon sa mga motoristang dumaraan sa naturang pangunahing kalsada.
Kinumpirma ng alkalde na ipinahuli na at pormal na pinakasuhan ang mga indibidwal na sangkot sa nasabing gawain upang tuluyan nang matigil ang ilegal na aktibidad.
Gayunpaman, sa kabila ng naging aksyon, nagpakita pa rin ng malasakit si Mayor Nieto sa pamamagitan ng pag-aalok ng alternatibong kabuhayan sa mga nahuli. Aniya, sa oras na makalaya ang mga ito, maaari silang magtungo sa kanyang tanggapan upang mag-apply bilang mga barangay tanod.
Sa ilalim ng planong ito, ang mga dating lumalabag ang mismong magsisilbing tagapagpatupad ng batas na ang pangunahing tungkulin ay hulihin ang mga mahuhuling nagkakalat at lumalabag sa tamang pagtatapon ng basura sa bayan.
Naniniwala ang alkalde na sa pamamagitan ng pagkakataong ito, magkakaroon ng maayos na hanapbuhay ang mga suspek habang nakatutulong sa pagpapanatili ng kalinisan sa Cainta. (AR BERNARDO)
