Kulungan ang bagsak ng isang binata matapos halayin ang katropang dalaga nang malasing at makatulog ang biktima sa loob ng silid ng kaibigan sa Malabon City, kahapon ng madaling araw.
Batay sa isinumiteng ulat ni Malabon police chief P/Col. Jay Baybayan kay Northern Police District (NPD) Director P/BGen. Rizalito Gapas, nakipag-inuman ang biktimang itinago sa pangalang sa alyas “Diana”, 19-taong gulang, Grade 12, residente
ng Brgy. NBBS, Navotas City, sa mga kaibigan, kasama ang suspek na si alyas “Jonathan”, 20-anyos, sa bahay ng isa nilang kaibigan sa Brgy. Longos, Lunes ng gabi.
Nang makaramdam na ng kalasingan, ipinasya ng biktima na makitulog sa isang silid sa bahay ng kaibigan, hanggang magising na lamang siya na wala nang saplot pang-ibaba at ginagawan na ng kahalayan ng suspek bandang 12:40 ng madaling araw.
Tinangka pa umanong manlaban ng biktima subalit, hindi niya kinaya ang lakas ng lalaki hanggang sa tuluyan siya nitong magahasa.
Matapos ang panghahalay ay humingi ng tulong ang biktima kina Erwin Cerdeña at Alfie Dela Cruz, kapwa barangay tanod ng Brgy. Longos, na agad na humuli sa suspek.
Naghain na ng kasong paglabag sa R.A. 8353 o ang Anti-Rape Law sa Malabon City Prosecutor’s Office ang biktima laban sa suspek.
Related Posts:
About Author
