TIMBOG sa mga operatiba ng Eastern Police District (EPD) ang isang lesbian sa isinagawang follow up operation sa kasong pang-aabuso ng menor-de-edad, sa tinutuluyan nito sa Candelaria, Quezon bandang alas-9:30 ng umaga, Hunyo 7, 2005.
Kinilala ni PBGen. Aden Lagradante, district director ng EPD, ang suspek na si alyas “Jennifer,” 44, na may standing warrant of arrest na inisyu ni Acting Presiding Judge ng RTC Branch 192 ng Marikina City.
Batay sa imbestigasyon, umabot sa 15 ulit na pinagsamantalahan ng suspek sa loob mismo ng tahanan ng 9 na taong gulang na babaeng biktima habang yaya ito at nagsilbing helper ng pamilya sa Marikina City.
Ayon pa sa ulat, nangyari ang mga pang-aabuso simula Agosto hanggang Setyembre ng taong 2024 at nitong huling bahagi ng Setyembre ay naglakas-loob na ang biktima na isumbong ito sa ina.
Dahil sa malagim na sinapit ng kaniyang anak, agad na humingi ang mag-ina ng tulong sa desk ng Violence Against Women and their Children (VAWC) sa barangay hanggang sa sinamahan ang mga ito sa pulisya.
“Nakakadurog ng puso ang nangyari sa inosenteng bata. Paglalaro at kasiyahan lang sana ang nasa kanyang isipan ngunit sa murang edad ay naranasan na niya ang karahasan ng isang mapagsamantala sa kanyang kahinaan,” ang pahayag ni Lagradante.
Ang suspek ay sasampahan ng kasong Sexual Assault at 15 counts ng Acts of Lasciviousness in relation to RA 7610 o Special Protection of Children Against Abuse, Exploitation and Discrimination Act of 1992.
Ang suspek, na itinuturing na top 3 most wanted person ng EPD ay kasalukuyang nakapiit sa Marikina City Police Station Custodial Facility habang naghihintay ng commitment order mula sa korte.
