NAHULI ang isang carnapper at itinuturing na most wanted person (MWP) ng Pasig PNP matapos isagawa ang isang manhunt operation nitong Hulyo 6, 2025, bandang ala-1:15 ng hapon sa kahabaan ng Westbank Road Floodway, Brgy. Maybunga, Pasig City.
Ayon sa ulat na natanggap ni PCol. Hendrix Mangaldan, chief of police ng Pasig City, kinilala ang suspek na si alyas “Bryle,” 35, at residente ng nasabing barangay.
Batay sa imbestigasyon, ninakaw ni alyas “Bryle” ang motorsiklo ng hindi pinangalanang biktima noong Pebrero 2, 2025 sa Quezon City.
Inaresto ang suspek sa bisa ng warrant of arrest na inisyu ng Regional Trial Court Branch 217 ng Quezon City na may Criminal Case No. R-QZN-25-04849-CR, na may petsang Hunyo 5, 2025 kaugnay sa paglabag sa R.A. No. 10883 o New Anti-Carnapping Law na may piyansang P300,000.00.
Bago nito, naaresto na rin ang suspek noong Pebrero 10, 2024 sa kasong paglabag sa Section 11, Article II ng Republic Act 9165 o Comprehensive Dangerous Drugs Act of 2002.
Kasalukuyang nakakulong sa custodial facility ng Pasig PNP si alyas “Bryle” habang inihahanda ang mga dokumento para iharap ng mga operatiba sa korte na nag-isyu ng warrant of arrest.
