TUMAAS ngayong taon ang crime efficiency solution (CSE) o epektibong pagresolba sa krimen ng Eastern Police District (EPD) kung ikukumpara sa kaparehong panahon noong nakaraang taon.
Ayon sa opisyal na pahayag ng pamunuan ng EPD, pumalo sa 95.9% ang crime efficiency solution sa huling lingo ng Mayo 2025 kumpara sa huling lingo ng Mayo noong 2024 na may naitalang 82.1% CSE.
Sinabi ni PBGen Aden Lagradante, district director ng EPD, ang pag-angat na ito ay resulta ng pinaigting na police visibility at mas aktibong pakikipag-ugnayan sa mga komunidad sa ilalim ng Metro East.
Batay sa datos, 38 operasyon laban sa ilegal na droga ang naisagawa at 54 suspek ang nahuli, na may 337 sachet ng shabu at 18.8 gramo ng marijuana na may tinatayang halaga na P2,319,800.00.
Umabot sa 63 nagtatagong kriminal ang nahuli sa ikinasang manhunt operation kung saan 2 dito ang top most wanted, 5 most wanted at 56 other wanted person.
Pagdating sa kampanya kontra ilegal na sugal, 55 indibiduwal ang nahuli na may kalakip na P12,883 pusta ang nakumpiska mula sa mga lungsod ng Pasig, Mandaluyong, Marikina at San Juan.
Tatlong suspek naman ang nahuli sa paglabag at pagkakaroon ng di-lisensyadong baril kung saan walang may naipakitang papeles, ayon pa sa report.
“Ang mabilis at maayos na pagresolba ng krimen sa Metro East ay resulta ng walang humpay na dedikasyon ng ating mga kapulisan, katuwang ang mga lokal na pamahalaan at mismong mamamayan,” Ayon kay Lagradante.
Sinabi pa ng district director na aktibong isinusulong ng EPD ang mga community-based programs gaya ng Barangay Peacekeeping Action Teams (BPATs) at mga crime awareness seminars upang hikayatin ang partisipasyon ng publiko sa pagpapanatili ng kaayusan.
“Pinatutunayan nito na ang mas mataas na presensiya ng kapulisan sa mga lansangan ay epektibong deterrent laban sa krimen sa mga pampublikong lugar gaya ng palengke, terminal, komersyal na establisyimento, at mga lugar na dati nang naitalang hotspot ng krimen,” dagdag pa ni Lagradante.
Related Posts:
Single ticketing system sa Mandaluyong City kasado na
Lalaki na wanted sa pagpatay, arestado sa Caloocan
4 parke sa San Juan City, smoke-free na
Reserve military force ng bansa, palakasin - Brawner
Paggawa ng perang papel na hindi mapepeke, ibinida online
Mahigit ₱200-K shabu, nasamsam sa 2 hinihinalang drug suspects sa Valenzuela City
Sakit ngayong tag-init, paano iwasan?
Higit ₱5-B tulong ng U.S. sa DepEd apektado sa bagong polisiya ni Trump
About Author
