WALANG negosasyong magaganap sa isinusulong na panibagong usapang pangkapayapaan sa pagitan ng pamahalaan at New Peoples Army (NPA), ayon kay Defense Secretary Gilberto Teodoro Jr.
“Hindi. Tutol tayo sa anumang usapang pangkapayapaan sa NPA,” ang sagot ni Teodoro sa tanong kung payag ba ang pamahalaan na makipag-usap sa mga rebelde.
Ayon kay Teodoro, handa na ang Philippine Army na harapin ang planong imbestigasyon ng senado sa nangyaring sagupaan noong Abril 19 sa pagitan ng mga rebelde at tropa ng pamahalaan sa Toboso, Negros Occidental.
“Ang mga Filipino ay payapa na. Sila itong nanggugulo sa kapayapaan, kaya bakit tayo makikipag-usap sa kanila? Sila itong gumagawa ng krimen,” dagdag pa ng kalihim.
Matatandaan na 19 ang patay sa nangyaring sagupaan at giit ng mga rebelde, may mga nadamay na sibilyan ngunit pinasinungalingan naman ito ng pamahalaan at sinabing nakipagbarilan ang mga sinasabing sibilyan.
“Gumagawa sila ng krimen at terorismo, ganun lang kasimple. Kaya ang panawagan ng usapang pangkapayapaan ay nangangahulugan lamang na lehitimo ang kanilang ipinaglalaban, at iyon ang hindi ko matatanggap,” ayon pa kay Teodoro.
