ISANG 12-anyos mula sa lalawigan ng Palawan ang pinakabatang naiulat na nasuri na may human immunodeficiency virus o HIV, ayon sa pinakahuling ulat ng Department of Health (DOH).
Ayon pa sa karagdagang datos mula sa kagawaran, mayroong 56 bagong kaso ang naiulat bawat araw mula Enero hanggang Marso ngayong taon, isang 500% na pagtaas ng HIV cases sa mga kabataang edad 15-24.
Dahil dito nagpahayag ng pangamba ang Commission on Population and Development (CPD) na nakakaalarma na ang paglobo ng HIV cases sa bansa lalo na’t karamihan sa mga nahawaan ay mga kabataan.
Karaniwan na, ayon sa CPD, naililipat ang HIV sa karaniwang pakikipagtalik ng lalaki sa babae ngunit nagbago ito tungo sa pakikipagtalik ng lalaki sa kapuwa lalaki o males having sex with males (MSM) mula pa noong 2007.
Idinagdag pa ng Komisyon na isa pang nakakaalarma ay ang pagtaas din ng bilang ng mga kabataan edad 10-14 taong gulang ang nabubuntis, mula 2,411 noong 2019 tungo sa 3,343 noong 2023.
Iginiit ngayon ng Commission on Population and Development ang isang “whole-of-society approach” upang malutas ang problemang ito na kinakaharap ng ating bansa.
Ilan sa mga dahilan, ayon pa sa Komisyon, ay ang kakulangan ng tamang impormasyon may kinalaman sa safe sex, HIV prevention, at paggamit ng kontraseptibo.
Pinatunayan ito ng 2021 Young Adult Fertility and Sexuality Study (YAFS5) na wala anilang materyal na napagkukunan ng impormasyon ang mga kabataan tungkol sa pakikipagtalik at sinundan naman ito ng maling impormasyon sa social media.
“Ang kapakanan ng ating mga kabataan kung saan nakadepende ang ating kinabukasan ay nanganganib kung hindi mabigyan ng solusyon ang kanilang sexual at reproductive health,” ang pahayag ni CPD Executive Director Usec. Lisa Grace Bersales.
Ayon pa kay Bersales, nakikipag-ugnayan na ang Komisyon sa mga lokal na pamahalaan upang mapalaganap ang adolescent health programs tulad ng ‘Parent-Teen Talk,’ ‘I Choose #MalayaAkongMaging,’ at ‘ProtectTEEN,’ isang social protection program para sa mga batang-ina at kanilang mga anak.
“Nananawagan kami sa mga guro, institusyon, lokal na pamahalaan, lalo na sa mga magulang at pamilya at iba pang stakeholders na samahan kami sa paglutas sa kritikal na isyung ito. Tiyakin natin na ang bawat kabataan ay maprotektahan,” dagdag pa ni Usec. Bersales.
Isinusulong din ng CPD na ang bawat lokal na pamahalaan ay magtayo ng mga ‘teen centers’ sa kanilang lugar at maisama ito sa kuwalipikasyon upang makamit ng mga LGU ang “Seal of Good Local Governance.”
Related Posts:
Lansakang libingan sa NBP?
Pagdinig ng senado sa impeachment, dapat ora mismo—Brosas
Grupong kontra yosi dismayado sa DA, First Lady
3 Bilanggo, nagdiwang dahil sa pagkapanalo sa BSKE
8 sugatan sa karambola ng 5 sasakyan sa Antipolo City
Beteranang aktres na si Jaclyn Jose, namaalam na
NCRPO ibinida ang kakayahan sa paggamit ng drone
Insidente ng krimen, bumaba sa 67% ngayong Kapaskuhan
About Author
