INARARO ng van ang ilang mga sasakyan matapos nitong makagitgitan ang isang motor sa Pasig Mega Market kagabi.
Ayon sa inisyal na ulat na nakalap ng BRABO News, nagkagitgitan umano ang isang van at motorsiklo malapit sa isang tindahan ng litson manok sa Mega Market o kilala bilang Pasig Palengke.
Nagkaroon pa umano ng sigawan nang komprontahin ng driver ng van ang driver ng motorsiklo hanggang sa naghabulan ito sa kalsadang napagitnaan ng palengke at parking building.
Dahil umano sa ayaw makipag-ayos ng driver ng motorsiklo, sinagasaan umano ito ng di pa nakikilalang driver ng van hanggang sa madamay ang isang kotse at tricycle.
Makikita sa video na kahit pinapahinto na ng mga tao ang van na may plakang NCU 602 ay patuloy pa rin itong nanagasa at ayaw bumaba kung kaya’t sinisipa na lamang ito ng mga tao.
Humihingi naman ng tulong ang may-ari ng ilang inararong sasakyan na matukoy kung sino ang may-ari ng van at kung sino ang nagmamaneho nito.
Batay pa sa nakalap na impormasyon ng BRABO News, babae umano ang may-ari ng van ngunit ito ay nabili na ng ibang tao.
Related Posts:
About Author
