Hinugot daw mula sa kaarawan ng kanyang kaanak ang matagal nang inaalagaang numero at masuwerteng nakalusot sa pagtaya sa Lotto 6/42 ang isanb kasambahay na isa na ngayong milyonarya dahil sa pagkapanalo ng P61,234,178.20.
Sa report ng pamunuan ng Philippine Charity Sweepstakes Office (PCSO), lumabas sa raffle draw noong July 1 ang winning combination number 18 – 25 – 12 – 14 – 13 – 22, ng isang kasambahay na taga-Las Piñas City at laking gulat at tuwa nang lumabas ang kanyang pinakaiingatang numero.
“Almost 20 years ko na pong tinatayaan yung mga birthdays namin mag-anak at buti naman sa awa ng Diyos ay nanalo din po kami,” kuwento ng winner.
Nabatid na kinubra ng winner ang kanyang panalo noong Huwebes sa PCSO office sa Mandaluyong City.
Ayon pa dito, malaking tulong sa kanya at sa kanyang pamilya ang nakuhang jackpot prize.
Sinabi pa nito na magpapagawa sila ng bahay at magpaparenta ng apartment at itatabi ang iba para sa kinabukasan ng anak.
Samantala, hinikayat ni PCSO General Manager Mel Robles ang publiko na patuloy tangkilikin ang pagtaya sa Lotto dahil bukod sa pagtataya ay nakakatulong pa dahil ang 30% dito ay napupunta sa kawanggawa.
Paalala pa ng PCSO na maaaring ma-forfeit ang panalo kapag hindi pa nakukuha sa loob ng isang taon.
