HINILING kahapon ng mga mambabatas sa Malacañang na tuluyan nang i-ban ang iba’t-ibang
POGO o Philippine Offshore Gaming Operators sa bansa dahil sa banta sa seguridad.
Sa isang pagdinig sa Senado kahapon, dahil umano sa pagdami ng scammers sa bansa,
nagpahayag nang labis na pagkabahala si Senador Risa Hontiveros dahil sa pagkalat ng iba’t-
ibang ID cards ng gobyerno na nakuha mula sa mga Chinese nationals na nahuli sa POGO.
Ilan sa mga government IDs ay ang TIN, PhilHealth, Police Clearance, Alien Certificate of
Registration, at Alien Employment Permit.
Nagtataka si Hontiveros kung bakit nakakuha nang naunang tatlo na nabanggit na IDs ang
Chinese nationals.
“Ang mga pagkuha ng ID na ito ang nagiging daan daw nila para maging legal na residente sa
Pilipinas at magkaroon ng Philippine passport… Ang mas masakit na tanong: May mga
kasabwat ba sila sa loob ng mga ahensya ng gobyerno?” tanong ni Hontiveros.
Kung bubusisiin daw natin ang lumalalang tensyon sa pagitan ng Beijing at Manila dahil sa
agawan sa teritoryo sa West Philippine Sea, sinabi ni Hontiveros na nakaaalarma na nabigyan
ng “all-access pass” ang mga ito sa pamamagitan ng POGO.
Hiniling ni Hontiveros, pati na siyam pang Senador kay Pangulong Ferdinand Marcos Jr. na
gradual na isara ang mga operasyon ng POGO at tuluyan na itong i-ban dahil sangkot sila sa
maraming krimen.
“Dapat i-ban na ni Presidente ang mga POGO. Kung totoong gusto niyang depensahan ang
bansa natin laban sa mga nambabastos sa ating soberanya, isama niya na ang buong
industriya ng online gambling sa mga pinapalayas sa ating teritoryo,” dagdag pa ng senadora.
Sinusuportahan si Hontiveros ni Senador Win Gatchalian. Sinabi ni Gatchalian na labis na
dumami ang mga krimen na kaugnay ng operasyon g POGO sa bansa, at ito raw ay labis na
nakababahala. Idinagdag pa niya na sangkot ang POGO operators sa online scam at may mga
koneksyon sila sa mga sindikatong kriminal.
Nilinaw ni Gatchalian na matagal nang nai-ban ang operasyon ng POGO sa maraming bansa,
at dapat nang sumunod ang Pilipinas.
Pumirma ang 10 Senador bilang pagsuporta sa tuluyang pag-alis ng POGO sa bansa. Ito ay
sina Senador: Ronald dela Rosa, Pia Cayetano, JV Ejercito, Ramon Tulfo, Grace Poe, Risa
Hontiveros, Loren Legarda, Joel Villanueva, Aquilino Pimentel III at Hontiveros.
