UMABOT sa 100,000 mga estudyante at 50,000 katao mula sa iba’t ibang komunidad at priabadong sektor ang lumahok sa isinagawang earthquake drill na isinagawa ng lokal na pamahalaan ng Marikina bilang paghahanda sakaling dumating ang “The Big One” sa Metro Manila.
Ayon kay Mayor Maan Teodoro nakapokus aniya ang isinagawang pagtugon sa sakuna sa bawat pamilya at komunidad kaya ang pinagsamang mga kalahok ay mula sa mga opisina ng lokal na pamahalaan, paaralan, negosyante at iba pang establisyemento.
Bilang bahagi ng nasabing earthquake drill, nagsagawa ng inspeksyon ang alkalde sa mga pag-aari ng lokal na pamahalaan na gagamitin sakaling dumating ang sakuna tulad ng City Disaster Risk Reduction and Management (DRRM) vehicles, mga ambulansya, fire trucks, at itatayong mga field hospital at command posts.
Tiniyak din ni Teodoro na sapat ang mga tauhan at kagamitan ng lungsod lakip na ang urban search and rescue tools and equipment tulad ng vibroscope (instrumentong ginagamit para malaman na may vibration at matunton ang pinagmulan nito) na karaniwang ginagamit sa mga biktima sa ilalim ng mga gumuhong gusali.
“Ang kaligtasan ng lahat ay tungkulin ng bawat isa. Dapat lagi tayong sama-sama at tulong-tulong at buong komunidad. Ito ang tinatawag natin na ‘whole-of-community approach’ sa iisang layunin—alagaan ang buhay at kaligtasan ng bawat taga-Marikina,” ang pahayag ni Teodoro.
Sinabi pa ng punong lungsod na napakahalaga aniya na isagawa sa tuwi-tuwina ang citywide earthquake drill, hindi lamang para sa impormasyon, kundi idiin sa lahat ang pagkaapurahan, disiplina at espiritu ng bayanihan sa mga mamamayan.
