Nagpahayag ng matinding pagkadismaya at pagkaalarma ang mga residente ng Makati, partikular na ang mga senior citizen at PWD, dahil sa iniulat na hindi gumaganang laboratory machines sa Ospital ng Makati (OsMak).
Dahil sa aberyang ito, napilitan ang mga pasyente na dagsain ang Makati Life sa District 1 na nagresulta sa napakahabang pila, habang ang iba naman ay napipilitang lumabas at gumastos ng malaking halaga sa mga pribadong ospital para lamang makapagpa-test.
Naging viral nitong Abril 16 ang isang Facebook post mula sa page na “Balitang Supremo” na umani na ng halos 98,000 views kung saan ibinuhos ng mga netizen ang kanilang hinaing tungkol sa kalagayan ng serbisyong medikal sa lungsod.
Ayon sa ilang komento, ang ugat umano ng problema ay ang pagpapalit ng service provider ng laboratoryo sa Makati na hindi naging maayos ang transisyon, kung kaya’t nanawagan ang mga residente na sana ay naging handa ang papalit na provider upang hindi ang mga tao ang nagtitiis, lalo na ang mga senior at PWD na nangangailangan ng regular na monitoring.
Ramdam na ramdam ang epekto ng problemang ito sa bulsa ng mga mamamayan dahil umaabot sa P5,000 hanggang P15,000 ang tinatayang halaga ng laboratory tests sa mga pribadong pasilidad na dapat sana ay libre o subsidized sa ilalim ng Yellow Card.
Isang residente na kinilalang si Amelita Flores ang nagbahagi na umabot sa P9,000 ang kailangang bayaran para sa laboratoryo nila ng kanyang anak, kung kaya’t tinitiis na lamang nila ang kanilang nararamdaman dahil sa kawalan ng pondo, habang ang ilang pasyente naman ay napaulat na ipinapadala pa hanggang sa Pateros-Taguig Hospital para lamang makakuha ng serbisyo.
Kinuwestiyon ng mga residente kung bakit nagkakaroon ng ganitong aberya sa isang lungsod na kilalang may malaking pondo at iminungkahi na habang wala pang bagong provider ay mag-consign muna ang pamahalaan sa mga pribadong pasilidad kung saan pwedeng gamitin ang Yellow Card.
Dahil sa sunod-sunod na pagtaas ng presyo ng bilihin at gasolina, lalong sumisidhi ang panawagan kay Mayora Abby Binay na mabilis na aksyunan ang krisis na ito sa laboratoryo ng OsMak upang hindi na madagdagan ang pasanin ng kanyang mga konstituente.
