Kinumpirma ni Pangulong Ferdinand Marcos Jr. nitong Huwebes ng gabi, April 16, 2026, na nasa kustodiya na ng mga awtoridad sa Prague, Czech Republic ang puganteng dating mambabatas na si Elizaldy “Zaldy” Co.
Ayon sa Pangulo, nadakip si Co matapos itong pumasok sa nasabing bansa nang walang maipakitang sapat na dokumentasyon.
“He is now detained in Prague after crossing into the Czech Republic without proper documentation and is currently in the custody of Czech authorities,” pahayag ni Pangulong Marcos.
Tiniyak ng Malacañang na nakikipag-ugnayan na ang gobyerno ng Pilipinas sa Czech government upang ayusin ang pagpapauwi sa dating mambabatas sa lalong madaling panahon.
“We are in close coordination with the Czech government to ensure that all legal processes are followed and to arrange for his return to the Philippines at the soonest possible time,” dagdag ng Pangulo.
Si Co, na dating kinatawan ng Ako Bicol Party-list at dating Chairman ng House Appropriations Committee, ay nahaharap sa mga kasong graft at malversation. Ito ay may kaugnayan sa bilyun-bilyong pisong maanomalyang flood control projects na nadiskubre noong nakaraang taon.
Naging mailap si Co sa batas simula pa noong huling bahagi ng 2025, kung saan huling namataan ang bakas nito sa Sweden at Portugal bago ang pagkakadakip sa kanya ngayong araw sa Czech Republic.
Inaasahang sasailalim sa matinding imbestigasyon ang dating mambabatas pagdating sa bansa kaugnay ng mga kinasangkutang kontrata sa ilalim ng Sunwest Group of Companies at iba pang alegasyon ng budget insertions. (AR BERNARDO)
