UMABOT sa P2,040,000 halaga ng pinaghihinalaang shabu ang nakumpiska ng mga operatiba ng District Drug Enforcement Unit (DDEU) ng Eastern Police District (EPD) sa ikinasa nitong buy-bust operation sa Brgy. Pinagbuhatan dakong alas-5 ng hapon, Enero 26.
Arestado ang dalawang suspek na sina alyas “Ryan” na itinuturing na isang ‘high value individual’ (HVI) at alyas “Andrea” na parehong 24-taong gulang at kapuwa residente ng nasabing barangay.
Batay sa ulat na nakarating kay PCol. Villamor Tullao, district director ng EPD, ikinasa ng DDEU ang nasabing operasyon nang makatanggap ang mga ito ng impormasyon mula sa isang confidential agent na muling nagbebenta ang suspek ng ipinagbabawal na gamot.
Ayon sa imbestigasyon, dati nang nadakip ang suspek noong Agosto 10, 2022 sa kahalintulad na kaso, kung saan humigit kumulang 55 gramo ng shabu ang nakumpiska mula sa rito, ngunit ito ay napawalang-sala.
“Tututukan natin itong partikular na kaso na ito at titiyakin natin na sa pagkakataong ito ay hindi na makakalaya itong suspek na ito…upang mabigyan ng hustisya ang kawawang mga naging biktima ng mga ito,” ang sinabi ni Tuliao sa panayam ng BRABO News.
Pansamantalang nakakulong ang dalawang suspek sa Pasig City Custodial Facility habang inihahanda ang isasampang kaso na paglabag sa Sec. 5 at Sec. 11 Art. ll ng Republic Act 9165 o ang Comprehensive Dangerous Drugs Act of 2002.
