DAHIL walang lumaban, awtomatikong panalo na si Congressman Martin Romuladez ng Unang Distrito ng Leyte bilang Speaker of the House of Representatives sa isinagawang botohan sa pagbubukas ng ika-20 Kongreso.
Bago nito, napabalitang lalabanan siya nina Congressman Albee Benitez ng Bacolod City, Congressman Toby Tiangco ng Navotas City at Congressman Duke Frasco ng Cebu bilang ika-aapat sa pinakamataas na puwesto sa gobyerno.
Sa ginanap na botohan, minabuti ng tatlo na mag-abstain—pero kasabay nito ng pagsasabing hindi rin sila kasama alinman sa minorya o mayorya, na pinaniniwalaang posibleng magsasama-sama ang tatlo upang bumuo ng independent minority bloc sa Mababang Kapulungan ng Kongreso.
Sa kabuuan, 269 mambabatas ang bumoto pabor kay Romualdez, 34 ang nag-abstain at ang ilan tulad nina Davao City First District Rep. Paolo Duterte, 2nd District Rep. Omar Duterte, PPP Partylist Rep. Harold Duterte at Davao City 3rd District Rep. Isidro Ungab ay nagwalk-out bago magsimula ang botohan at nanatiling independiyente.
Inihalal naman sina Quezon province 2nd District Representative Jay-jay Suarez bilang Deputy Speaker at Majority Leader naman si Ilocos Norte 1st District Representative Sandro Marcos.
