AYON sa batas, may diskresyon pala ang mga pulis na hindi na kailangang ikulong at sampahan ng kaso ang mga drayber na inosente sa mga insidente na kahit sino ay hindi kayang kontrolin.
Kuning halimbawa na lamang itong nangyari sa LRT FPJ Station kung saan nagpatihulog ang isang estudyante, bumagsak sa harapan ng kotse, nasagasaan at nakaladkad na posibleng naging sanhi ng pagkamatay nito.
Kahit sino ang tanungin mo, lahat ay magsasabing walang nangyaring reckless driving o kawalang ingat na pagmamaneho dahil sino ba naman ang mag-aakala na babagsak na lamang sa harap niya ang isang katawan ng tao.
Sabi nga ng ilan sa social media, dapat daw ay sa taas na ngayon nakatingin ang mga drayber at hindi na sa kalsada baka nga naman daw biglang may mahuhulog galing kung saan-saan.
Nakakatawa isipin insan pero ito ang realidad sa buhay kalsada ng mga motorista kung saan ayon sa mga otoridad ay biktima lang din ng pagkakataon.
Kaya hindi minsan natin lubos maisip na bakit ito ang nangyayari, eh yon pala naman ay puwede nang hindi sampahan ng kaso ng mga pulis ang walang kasalanang drayber.
Minsan daw kasi, para lang may mai-report eh ikulong na nlang nila, ipaubaya sa taga-usig o prosecutor kung may probable cause at hayaang ang judge na o hukom ang magpasya kung may kasalanang ba o wala ang drayber.
Iyan ay kahit na obvious na obvious na na walang kasalanan ang kawawang drayber.
Ang masaklap pa dito, minsan ay medyo natatagalan ang pagkakadetine ng drayber na biktima lang din ng pagkakataon dahil sa mabagal na usad ng korte at iba pang kadahilanan.
