MATAPOS tanggapin ng retiradong senior associate justice ng Korte Suprema na si Antonio Carpio ang hamon na debate, sinabi ni Senador Rodante Marcoleta na hindi aniya dapat limitahan ang paksang pagdedebatehan.
Ito’y matapos magtakda si Carpio ng mga paksang pag-uusapan sa debate tulad ng katanungang: “Is there legally a West Philippine Sea? At kung mayroon aniya, are the maritime features of the Kalayaan Island Group part of the West Philippine Sea?
Sa kaniyang social media post, nagpasalamat ang senador na tinanggap ni Carpio ang hamon niya para sa isang palakaibigang debate.
“Nagpapasalamat tayo kay dating Associate Justice Antonio Carpio sa pagtanggap sa aking mungkahi para sa isang friendly debate upang masagot ang mga katanungan may kinalaman sa West Philippine Sea (WPS),” ang pahayag ni Marcoleta.
“Sa pagtatapos ng debate, magkakaroon na ng malinaw na impormasyon kaugnay sa ating karagatan, at ang mananalo sa nasabing diskusyon ay ang atin mismong mga kababayan,” dagdag pa ng mambabatas.
Ngunit ayon kay Marcoleta, mahahadlangan aniya ang layunin ng diskurso kapag nakapalibot lamang sa dalawang paksa na inilatag ni Carpio kaugnay sa WPS.
“The West Philippine Sea issue cannot be reduced to a binary legal inquiry on terminology or geographic inclusion, as this risks pre-framing the debate in favor of a particular narrative rather than enabling a genuine examination of all relevant discussions,” ayon pa kay Marcoleta.
Umaasa ang senador na papayag ang dating mahistrado sa makabuluhang debate na “walang itinatakdang limitasyon” sa pag-uusapang paksa.
