NADAKIP ng mga operatiba ng Navotas City Station Drug Enforcement Unit (SDEU) ang dalawang hinihinalang tulak ng iligal na droga, sa isinagawang buy bust operation kamakalawa ng gabi.
Kinilala ang mga suspek na sina alyas “Maroy” at “Bugoy.”
Pinangunahan ni P/Cpt. Genere Sanchez ang ikinasang operasyon sa Tanigue St., Barangay NBBS Dagat-dagatan, kung saan isang pulis na nagpanggap na buyer ang nagawang makipag-tranksaksyon sa mga suspek ng ₱500 halaga ng droga.
Agad inaresto ang dalawa nang tanggapin ng mga ito ang markadong salapi mula sa pulis poseur-buyer kapalit ng isang plastic sachet ng shabu.
Nakuha mula sa mga suspek ang aabot sa 5.3 gramo ng hinihinalang shabu na nagkakahalaga ng ₱36,040 at buy bust money.
Kinasuhan na ang mga suspek sa paglabag sa RA 9165 o Comprehensive Dangerous Drug Act of 2002.
