SUPORTADO ni Cainta, Rizal Mayor Kit Nieto ang kampanya ng Land Transportation Office (LTO) na ipagbawal ang pagdaan ng mga e-trike, e-bike at ilan pang light electric vehicles (LEV) sa pangunahing mga lansangan na sakop ng nasabing bayan.
Kasabay nito, magsasagawa ng monitoring ang lokal na pamahalaan kaugnay sa magiging resulta nito at
gumawa ng balanseng ulat upang maisama sa mga isyung at rekomendasyon sa Metropolitan Manila Development Authority (MMDA) at LTO.
Sa ginanap na press conference kasama ang mga mamahayag na miyembro ng PaMaMariSan-Rizaal Press Corps, sinabi ni Nieto na malaking bagay ang pagsunod dahil ito y kautusan mula sa pamahalaang nasyunal.
Isa rin sa naging pangunahing paksa ay ang paghingi ng exemption, espesyal permit ng ilang mga sektor para na rin sa kanilang kapakanan kahit hindi pa nga aniya lubusang naipapatupad.
“Hindi natin dapat kontrahin ang mga polisiya mula sa taas dahil iyan ang isang paraan para magkaisa tayo. Kailangan nating sumunod dahil tayo y iisa rin ang layunin,” saad ni Nieto.
“Asul, dilaw o pula man ang kulay ng ating bandila, hindi natin dapat gawing kumplekado ang isyung ito. Dahil lahat tyo, gusto ng pagkaakaisa,” dagdag pa ng alkalde.
Giit pa ni Nieto bigyan ng pagkakataon na makausad muna ang nasabing kampanya ng ahensya dahil pinag-usapan muna aniya ang bagay na ito ng mga nasa taaas bago ang implementasyon.
“Kung sinabi ng LTO na ganito ang gagawin natin, eh di ganito. Sila lang kasi ang inatasan ng batas bilang mandato. Sundin nating lahat. ‘Yan ang pinamagaan na paraan ng pamamahala,” pagtatapos ng alkalde.
