SA PANGKALAHATAN, naging maayos ang naging resulta sa ginawang pagsisikap ng Department of Education (DepEd) na mapanatili ang kaayusan sa pagbubukas ng klase ngayong taon.
“So far ok naman, smooth and orderly naman ‘yun pagbubukas natin ng klase,” ayon kay DepEd Secretary Sonny Angara sa panayam ng mga mamamahayag sa Epifanio Delos Santos Elementary School sa Maynila.
Sinabi pa ng DepEd na bukas ang hotline ng ahensya para tumanggap ng mga reklamo at iba pang karaingan may kaugnayan sa unang araw ng klase para sa school year 2025-2026.
Sinamahan ni Angara si Pangulong Ferdinand Marcos, Jr sa pagbubukas ng klase sa Epifanio Delos Santos Elementary School sa Malate, Maynila kaninang umaga.
Ipinatupad nagyong taon ng DepEd ang iba’t-ibang reporma para suportahan ang mga mag-aaral at mga guro kasama na dito ang simpleng proseso sa enrollment.
Inilatag din ng ahensya ang may kinalaman sa kalusugan ng mga estudyante, delivery ng laptops, mga smart TV at iba pang digital na mga kagamitan sa eskuwelahan.
Ibinida din ni Angara ang mas mataas na medikal at teaching allowance para sa mga guro, hiring ng karagdagang mga guro at administrative staff at iba pang programa na ang layunin ay mabawasan ang bigat ng mga ginagawa ng mga guro.
“Malaking pasasalamat natin kay Pangulong Marcos sa mga repormang agad niyang itinulak para sa edukasyon. Mas mararamdaman ito ng ating ng mga guro at mag-aaral ngayong balik-eskwela.” Ang pahayag ni Angara.
“Kasama na dyan ang ang dagdag-suporta, kagamitan, at mga polisiyang nagpapagaan sa araw-araw nilang karanasan sa paaralan,” dagdag pa ng dating senador.
Kasabay nito, ipinatupad na rin ng ahensya ang mas pinalakas at pinatibay na kurikulum para sa mga estudyante sa senior high sa taong ito upang maging handa na ang mga ito sa kolehiyo at trabaho.
