DOH, nagbabala laban sa ‘Pautang sa Malasakit Center’

Pinag-iingat ng Department of Health ang publiko kaugnay sa mga pekeng loan centers na iniuugnay sa Malasakit Program Office.

Ibinahagi ng kagawaran sa kanilang official Facebook page ang screenshot ng facebook page na “Malasakit Center Loan Assistance,” na mayroong 1,100 followers.

Nilinaw ng DOH na peke ang naturang page at hindi rin ito konektado sa kanila.

Nagbabala naman ang kagawaran na maghahain sila ng mga kasong kriminal laban sa mga indibidwal na nasa likod ng pekeng page kung magpapatuloy ang mga post na may kaugnayan sa mga maling impormasyon.

Samantala, hinimok din ng DOH ang publiko na kumuha lamang ng mga impormasyon mula sa mga legitimate sources at platforms.

About Author

Jaya Luzuriaga

See author's posts