NAGPAHAYAG ng buong suporta si Chinese Ambassador Jing Quan sa isinusulong ng bansa na isang mas malinis at makakalikasang transportasyon sa pamamagitan ng pagpapakilala ng mga makabagong electric vehicle mula sa China.
Noong Abril 9, 2026, binisita ng embahador ang flagship showrooms ng sikat at gawang China na mga card brand tulad ng BYD at Denza na mabibili na sa Pilipinas.
Sa nasabing pagbisita, inimbitahan ni Quan si Ceferino Rodolfo, ang Undersecretary for the Industry Development Group (IDG) ng Department of Trade and Industry (DTI) upang subukan ang isa sa mga tanyag na modelo ng BYD.
Ayon kay Ambassador Quan, inaasahang makatutulong ang mga Chinese new energy vehicles sa pagsusulong ng mas green and environment-friendly na sistema ng transportasyon para sa mga Pilipino.
Ipinapakita rin ng inisyatibang ito ang patuloy na pagpapalakas ng kooperasyon sa pagitan ng Pilipinas at China sa larangan ng teknolohiya, kalakalan, at sustainable development, na naglalayong magbigay ng modernong solusyon sa pangangailangan sa mobility ng bansa. (IZA ALDANA)
