INILATAG na ng Eastern Police District (EPD) ang security plan para sa nalalapit na “White Ribbon Movement” rally na gaganapin sa EDSA People Power Monument sa Hunyo 28.
Magsisilbing Civil Disturbance Management (CDM) ang mga EPD personnel na itatalaga sa EDSA Shrine para panatilihin ang kaayusan, tiyakin ang kaligtasan ng publiko, at maglaan ng seguridad sa iba pang gagawing activity.
Magdadagdag din ang District Headquarters (DHQ) ng puwersa mula sa Pasig, Mandaluyong, Marikina at San Juan City Police Stations (PaMaMariSan CPS) bilang Reactionary Standby Support Force na nakahanda anumang oras bilang reinforcement.
Samantala, patuloy na paiigtingin ang anti-criminality operations sa buong Metro East, partikular na sa mga transport terminal, commercial establishments, major thoroughfares, at iba pang pasilidad at matataong lugar, bago, habang at pagkatapos ng rally.
Nakipag-ugnayan na rin ang mga otoridad sa iba’t ibaang ahensya, lokal na pamahalaaan, force multipliers, at emergency response team upang tiyakin ang kaayusan sa nasabing rally.
Binigyang-diin ni Police Brigadier General Melecio Buslig Jr., district director ng EPD, na pangunahin sa kanila ang matiyak na magiging payapa ang rally habang igagalang ang karapatang magpahayag ng mga raliyesta.
“Tinitiyak ng EPD na magiging payapa at maayos ang White Ribbon Movement rally. Ipinaalala natin sa ating mga tauhan ang maximum tolerance, igalang ang karapatang pantao, at makipagtulungan sa katuwang na mga ahensya at LGU kaugnay sa kaligtasan ng mga sasama at dadalo,” ang pahayag ni Buslig.
Hinihikayat din ng mga otoridad ang publiko na maging mapagmatyag, makipagtulungan sa mga alagad ng batas, at kaagad na iulat sa pinakamalapit na istasyon ng pulis ang anumang kahina-hinalang gawain.
