IBINULGAR ni Senate Pro Tempore Panfilo Lacson na may gumagapang umano na senador para himukin ang ilan sa kanilang mga kasamahan na huwag pumirma sa partial report ng blue ribbon committee kaugnay sa kanilang isinagawang imbestigasyon sa maanomalyang flood control projects.
Batay sa pinakahuling tala, tatlong pirma na lang ang kailangan para maisalang na sa plenaryo ang nasabing report.
Sa isang panayam sa radyo, sinabi ni Lacson na ang nasabing impormasyon ay galing kay Senate President Vicente Tito III na tumutulong sa kaniya para makakuha ng kinakailangang lagda.
“May nakausap siyang isa at tinanong niya dahil malapit sa amin. Ang pagkasabi sa kanya, pasensya na kasi napakiusapan ako ng isa sa minority ngayon na dati naming kasama sa majority,” ang pahayag ni Lacson sa isang panayam sa DWIZ.
Bagama’t hindi pinangalanan ni Lacson ang mga senador, sinabi niya na ang nakikiusap umano ay mula sa hanay ng minorya.
Ang minorya sa senado ay sina Alan Peter Cayetano, Francis Escudero, Imee Marcos, Ronald Dela Rosa, Bong Go, Joel Villanueva, Robin Padilla, Rodante Marcoleta at Jinggoy Estrada.
Sa kasalukuyan, sina Sotto, Lacson, Erwin Tulfo, Bam Aquino, Kiko Pangilinan at Risa Hontiveros pa lamang ang mga senador na nakapirma na sa nasabing partial report.
“May disappointment pero mas nananaig yung naiintindihan ko yung situation nila kasi alam mo, tao lang naman tayo. Laging may human factor, human element na magseset in. Di natin maiwasan yun. Mayroon tayong kaibigan, malapit man o hindi, na gusto nating pagbigyan,” dagdag pa ng senador.
Matatandaan na nitong Pebrero iniurong ng tatlong senador na sina Migz Zubiri, Sherwin Gatchalian at JV Ejercito ang kanilang lagda sa nasabing partial report sa iba’t ibang kadahilanan.
