SA ISANG opisyal na pahayag, pinalagan ng Department of Foreign Affairs (DFA) ang umano’y ilegal na paggamit at pagtatapon ng cyanide sa Ayungin Shoal ng mga mangingisdang Tsino, isang insidenteng may implikasyon sa kapaligiran at soberanya ng bansa.
Ayon sa ahensya, kanilang kinilala ang pahayag na inilabas noong Abril 14 ng National Security Council (NSC), sa pamamagitan ni Assistant Director General at Spokesperson Cornelio H. Valencia, kaugnay sa paggamit ng mapanganib na kemikal sa nasabing lugar.
Dagdag pa ng kagawaran, hinihintay pa umano nito ang pormal na ulat mula sa mga kinauukulang awtoridad ukol sa resulta ng siyentipiko at teknikal na pagsusuri sa mga kemikal na nakumpiska mula sa mga Chinese fisherfolk sa Ayungin Shoal noong nakaraang taon.
Ang naturang ulat ang magiging batayan ng DFA sa pagtukoy ng naaangkop na diplomatikong hakbang sa usapin.
Binigyang-diin pa ng ahensya na ang paggamit ng cyanide at iba pang nakalalasong kemikal sa karagatan ay iresponsable at hindi katanggap-tanggap.
Taliwas umano ito sa mga obligasyon ng mga bansang lumagda sa United Nations Convention on the Law of the Sea (UNCLOS), partikular sa tungkuling pangalagaan at panatilihin ang kalinisan ng karagatan at yaman nito upang maiwasan ang polusyon.
Muli namang iginiit ng pamahalaan ng Pilipinas na patuloy nitong babantayan at tututulan ang anumang paglabag sa soberanya, at hurisdiksyon ng bansa sa lahat ng saklaw ng teritoryong pandagat nito.
Sinabi pa ng DFA na mananatiling matatag ang Pilipinas sa pagtatanggol sa pambansang interes at sa pangangalaga ng yamang-dagat sa West Philippine Sea. (IZA ALDANA)
