NAPURNADA ang balak ng isang 52-anyos na lalaki matapos umanong dukutan ang isang jeepney driver habang bumibiyahe sa Tondo, Maynila.
Kinilala ang suspek sa alyas Artemio, binata, walang trabaho, at residente ng Parola Compound Barangay 20, Tondo.
Batay sa ulat ng Manila Police District Station 12, sumakay ang suspek sa jeep na minamaneho ng biktimang si alyas Ramon sa kanto ng Mel Lopez Boulevard at C.M. Recto Avenue patungong Divisoria.
Habang nasa biyahe, napansin ng driver na palihim na kinukuha ng suspek ang kanyang wallet mula sa jacket na nakasabit sa loob ng sasakyan.
Agad niya itong nahuli sa akto at nahawakan ang kamay ng suspek. Nagkataon namang nakahinto ang jeep sa tapat ng mga nagpapatrolyang pulis kaya agad na naaresto ang suspek.
Nabawi ang wallet ng biktima na may lamang mga ID at humigit-kumulang 300 pesos na cash.
Kasalukuyang nahaharap ang suspek sa kasong Theft o paglabag sa Article 308 ng Revised Penal Code. (AR Bernardo)
