ISINUSULONG ni House Minority Leader Marcelino “Nonoy” Libanan ang paggamit ng bilyon-bilyong pisong kita mula sa Malampaya para magpatayo ng mga coastal petroleum storage facilities sa ilalim ng Philippine National Oil Co. (PNOC).
Kasabay nito, lubos ang tiwala ng mambabatas na papaboran siya ng kanyang mga kasamahan sa House of Representatives sa panukala niyang na manggagaling ang pondo mula sa kita ng Malampaya Deep Water Gas-to-Power Project.
Ang panukala ni Libanan ay bunsod ng nararanasang krisis sa bansa ng produktong petrolyo dulot ng nagaganap na giyera sa Gitnang Silangan sa pagitan ng US-Israel laban sa Iran.
Layon ng panukala ni Labanan na magsilbing “buffer stock” o reserbang suplay ang itatayong mga pasilidad upang protektahan ang mga Pilipinong konsyumer at maliliit na negosyante mula sa “oil price shock” o ang biglaang pagtaas ng presyo ng krudo at gasolina, na kadalasang nagpapataas sa presyo ng mga pangunahing bilihin.
Sa panukala ni Labanan, magtatayo ng mga storage tanks sa mga estratehikong bahagi ng Visayas at Mindanao.
Hinikayat din ng kongresista ang pamahalaan na payagan ang PNOC na gamitin ang kanilang sariling kita para sa mga capital investment.
Ayon sa datos, umabot na sa ₱200 bilyon ang naiaambag ng Malampaya sa kaban ng bayan mula 2014 hanggang 2024, at 20 porsyento ng kuryente sa Luzon ay nagmula sa Malampaya, (FELIX TAMBONGCO)
