AARANGKADA na sa plenaryo ng Mababang Kapulungan ng Kongreso ang panukalang batas na magbubuwag sa provincial rate na pasahod sa mga manggagawa.
Ito ang sinabi ni Rep. Eli San Fernando ng Kamanggagawa Partylist at pangunahing nagsusulong sa nasabing panukala, matapos aprubahan ang komite report.
Sa inilabas na video ng kongresista, may pananabik nitong inanunsyo at humihiling sa mga manggagawa na tulungan siyang maisalang agad sa plenaryo upang pagdebatehan o dili kaya’y amyendahan ang ilang probisyon sa panukala.
“Tulungan ninyo akong kalampagin ang inyong mga district representative o partylist representative upang bumoto pabor sa panukalang ito,’ ang pakiusap ni San Fernando.
Ang pagbuwag sa nasabing provincial rate na pasahod ay numero unong tinutukan ng mambabatas nang manalo ito sa nakaraang halalan upang aniya ay tuparin ang kaniyang ipinangako kaugnay sa nasabing isyu.
Ayon pa kay San Fernando, matagal na aniyang nagtitiis ang mga manggagawang Pilipino sa isyu na mas mababa ang sahod ng mga manggagawa sa mga lalawigan kumpara sa Kalakhang Maynila.
Giit pa ng baguhang kongresista, hindi aniya makatuwiran ang kasalukuyang batas na ipinatutupad dahil halos wala naman umanong pagkakaiba sa presyo ng bilihin sa Metro Manila at mga probinsiya.
