NANAWAGAN si former Ilocos Sur governor Luis “Chavit” Singson na ibalik ang usapan sa isyu ng flood control projects at ituloy ang imbestigasyon ngunit hindi na sa ilalim ng Independent Commission for Infrastructure (ICI) dahil wala na umano itong kredibilidad matapos ang sunod-sunod na pagbitiw ng mga miyembro nito.
Sa isang press conference sa Club Filipino sa San Juan City kaninang umaga, sinabi ni Singson na dapat aniyang ilabas si Sarah Discaya at pagsalitain uli dahil marami pa umano itong isisiwalat kaugnay sa korapsyon na nakapaloob sa DPWH flood control projects controversy.
Inakusahan pa ng dating gobernador na si dating Speaker Martin Romualdez umano ang nagtatago kay Orly Guteza, ang dating resource person sa Blue Ribbon committee hearing sa senado na bigla na lamang nawala.
Matatandaan na sa kalagitnaan ng senate hearing noong nakaraang taon, bigla na lang iprinisinta ni Senator Rodante Marcoleta si Guteza at tuwirang inginuso nito si Rep. Zaldy Co na naghatid ng mali-maletang pera sa bahay ni Romualdez.
Kalaunan ay pinatutuhanan ito ni Co sa kaniyang sunod-sunod na pagsisiwalat kung saan diretsahan namang sinabi nito na nag-deliver din siya ng milyun-milyong pera sa Malacañang at bahay ni Romualdez.
Dahil dito, sinisimulan na umano ng mga kasamahan ni Singson na makipag-usap sa iba’t bang sektor ng lipunan partikular na sa mga religious groups para sa ikakasa nilang “one time, big time” anti-corruption rally na posibleng gagawin sa Pebrero.
