SA PINAKAHULING tala ng Department of Education (DepEd), umabot na sa 312 paaralan sa buong bansa ang napinsala bunsod ng pananalasa ng Bagyong #UwanPH kung saan kabilang ang Bicol at CaLaBaRZon sa mga rehiyong pinakmatinding tinamaan.
Sa inilabas na Nobyembre 10, 12nn bulletin ng DepEd Disaster Risk Reduction and Management Service (DRRMS), may 1,182 silid-aralan ang bahagyang napinsala, 366 ang malubhang nasira at 261 naman ang tuluyang nasira.
Ayon kay Secretary Sonny Angara, pangunahing pinagtutuunan nila ng pansin ngayon ang kaligtasan, agarang proteksyon at tulong sa mga estudyante, guro at mga kawani ng paaralan.
“Mabigat ang pinagdadaanan ng ating mga guro, magulang, at mag-aaral sa nagdaang Bagyong Uwan at Tino. Nakikiramay tayo sa ating mga kababayan at tinitiyak namin sa DepEd na kasama ninyo kami sa bawat hakbang ng pagbangon at muling pagbuo ng pag-asa sa bawat silid-aralan,” ang pahayag ni Angara.
Iniulat din ng DepEd na 5,572 silid-aralan sa 1,072 paaralan sa 11 rehiyon ang kasalukuyang ginagamit bilang evacuation centers na pansamantalang tinutuluyan ng mga pamilyang lumikas.
Sinabi pa ng Kalihim na may nakatakda ng pondo ang ahensya na ₱20.2 milyon para sa paglilinis at clearing operations ng mga nasirang eskuwelahan, at ₱57.9 milyon para sa minor repairs.
“Inuuna rin ng DepEd ang implementasyon ng Alternative Delivery Modes (ADMs) sa mga paaralang pansamantalang sarado dahil sa mga nakaraang bagyo at iba pang kalamidad,” giit pa ni Angara.
Idinagdag pa ng ahensya na naipamahagi na rin ang pondo sa mga rehiyon para sa paggawa ng learning packets at lesson guides sa ilalim ng Dynamic Learning Program (DLP) at iba pang ADM modalities.
