ISINUSULONG ng isang mambabatas sa Mababang Kapulungan ng Kongreso ang pagpapalawak ng programang “Iskolar ng Bayan” upang maibsan ang gastusin ng mga senior citizen na sumusuporta sa edukasyon ng kanilang mga apo.
Sa isang press conference kaninang umaga sa Pasig City, sinabi ni Senior Citizens Party-list Representative Rodolfo “Ompong” Ordanes na ang budget na 30% ay kukunin mula sa 1% ng real property tax ng bawat local government unit na nagsisilbing Special Education Fund (SEF).
Layon din ng panukala na libu-libong mga estudyante ang makapagtapos sa programang ito bilang bahagi na rin ng pagsisikap ng pamahalaan na matugunan ang problema sa kakayahang magsulat at bumasa ng mga bata.
“Bubuo tayo ng local selection committee kung saan magiging mga miyembro rito ay magmumula sa religious sector, DepEd at civil society upang aprubahan kung sinu-sino ang karapat-dapat na makinabang sa programa gamit ang gagawing IRR o implementing rules and regulations,” ang pahayag ni Ordanes.
Matatandaan na naisabatas noong 18th Congress ang social pension ng mga senior citizen kung saan inilaban ni Ordanes na maiakyat mula P500, naging P1,000 na ito bawat buwan.
Noong nakalipas na 19th Congress, sinabi ni Ordanes na nakapasa na ang Centenarian Act kung saan ang mga senior citizen na indigent, mahina na, at sakitin edad 80, 85, 90 at 95 ay may matatanggap na P10,000 at ipapatupad na ngayon taon.
