IGALANG ang naging pasya ng Kataas-taasang Hukuman at ‘tuloy ang buhay.’
Ito ang tinuran ni Undersecretary Atty. Claire Castro ng Presidential Communications Office (PCO) matapos ideklara ng Korte Suprema noong nakaraang linggo na salungat sa isinasaad ng Saligang Batas ang inihaing reklamo laban kay Vice President Sara Duterte.
Binigyang-diin ni Castro na dapat aniya na ibigay ng publiko ang tiwala nito sa Korte Suprema bilang ang natatanging institusyon para sa pagbibigay-kahulugan sa batas.
“Ang impeachment ay saklaw ng lehislatura at hudikatura, at kinikilala namin ang kanilang kalayaan sa pagtupad sa tungkulin sa ilalim ng Saligang Batas,” sabi ni Castro.
Muling nanindigan ang Palasyo na walang kinalaman ang Pangulong Ferdinand Marcos Jr. sa ingay ng impeachment complaint laban sa Pangalawang Pangulo dahil usapin aniya ito ng dalawang co-equal branch, ang Senado at Kamara.
Giit pa ni Castro, hindi aniya binanggit ni Pangulong Marcos sa kaniyang State of the Nation Address (SONA) noong Lunes ang may kinalaman sa impeachment.
Patunay lamang ito na maliban sa walang kinalaman, mas abala aniya ang Pangulo sa pagtugon sa pangangailangan ng mga Pilipino.
Matatandaan na nagsagawa ng isang espesyal na pagdinig ang Supreme Court en banc upang pagpasyahan ang inihaing petisyon ng panig ni Duterte na ibasura ang articles of impeachment na pinaburan naman ng mga hukom.
