17 pamilya, naapektuhan ng sunog sa Binangonan, Rizal

Tinupok ng apoy ang aabot sa 10 kabahayan sa Barangay Darangan, Binangonan, Rizal, noong Sabado.

Aabot sa 17 pamilya ang naapektuhan ng sunog na kasalukuyang nasa Saint Francis of Assisi Chapel na kalapit ng barangay, habang isang fire volunteer naman ang nasugatan sa insidente.

Batay sa pagtaya ng Bureau of Fire Protection-Binangonan, aabot sa ₱750,000 ang halaga ng ari-arian na naabo sa sunog.

Ayon kay SFO1 Julian Lenon Membreve, fire investigator, nagsimula ang sunog bandang alas-9:17 ng gabi at dakong alas-9:19 nang itaas ang first alarm, na umabot ng second alarm bandang alas-9:37 ng gabi.

Dakong alas-10:19 ng gabi nang ideklara itong fire out.