PAIIGTINGIN ng Land Transportation Office ang pagpapatupad ng “no registration, no travel” policy upang mapilitang magparehistro ang mga delinquent motor vehicle owner.
Inatasan ng pamunuan ng Land Transportation Office (LTO) ang lahat ng regional offices nito na maghigpit sa pagpapatupad ng nasabing polisiya matapos malaman na karamihan ng mga bumibiyaheng sasakyan ay hindi pa rehistrado o paso na ang lisensya.
Sa pinalabas na pahayag ni LTO chief Assistant Secretary Vigor Mendoza, nasa 24.7 million, o nasa 65% ng 38.3 million motor vehicles nationwide na may record ng ahensya ay napag-alamang nasa “delinquent” stage o napabayaan at pinabayaang hindi na mai-rehistro ang kanilang sasakyan.
Giit pa ni Mendoza na nalugi ang LTO ng ₱37.15 billion ngayong taon sa mga uncollected registration fees and penalties na kung saan nakakaalarma na dahil posibleng maraming delinquent vehicles ang hindi nakapasa sa roadworthiness inspections at emission tests, maging sa insurance coverage ay wala ito.
“Maituturing na banta ang mga delinkwenteng sasakyan sa kalsada kung magpapatuloy sila sa pamamasada kaya kailangang mahigpit na ipatupad ang batas ng land transportation para na rin sa kaligtasan ng mga road users,” ayon pa kay Mendoza.
Kasunod nito ang direktiba ni Transportation Secretary Jaime Bautista na panatilihing ligtas ang kalsada sa mga road users
Sa ilalim ng Republic Act No. 4136 o Land Transportation and Traffic Code, walang motor vehicle na ibibiyahe sa kalsada hanggat hindi rehistrado.
Base sa datus ng LTO, mayroong 20.15 million, o 81.5% ang kabuuang delinquent vehicles ay mga unregistered motorcycles, kasunod ay four-wheel vehicles na may total na 4.01 million, at trucks and buses na nasa 490,000.
Mayroong mataas na bilang ng mga delinquent vehicles sa National Capital Region (NCR) na nasa 4.1 million base sa data ng LTO kasunod nito ang 3.3 million sa Central Luzon at 2.7 million sa Calabarzon.
Nasa 1.8 million naman ang mga delinkwenteng sasakyan na nasa Western and CentraI Visayas at sa Eastern Visayas ay may 758,000.
Sa Mindanao, ang Davao region ang may mataas na bilang ng delinquent vehicles na umabot na sa 1.2 million, sinundan ng Soccsksargen region na mayroong 1.1 million, habang sa Zamboanga Peninsula at Northern Mindanao ay nakapagtala ng 1 million delinquent vehicles.
Una nang iniutos ni Mendoza na pag-aralan ang lahat ng data ng LTO kung saan ang puwedeng palakasin para tumaas ang revenue-generating measures.
Nilinaw nito na ang nawawalang ₱37.15 billion ngayong taon ay mula sa ₱15.5 billion revenue loss sa unregistered motorcycles, P18.4 billion mula sa four-wheel vehicles at ₱3.25 billion sa trucks and buses.
Kaya naman mula ngayon, mahigpit nang paiiralin ng LTO ang “no registration, no travel” policy, ayon kay Mendoza.
Related Posts:
About Author
