Lantang gulay ang isang 79-anyos na ina makaraang bugbuging ng sariling anak nang makitang walang nakahaing pagkain sa mesa, Biyernes ng gabi sa Barangay Longos, Malabon City.
Nagtamo ng sugat at pasa sa iba’t ibang bahagi ng katawan ang biktima na si Nanay Bina nang banatan ng kanyang sariling anak na 41-anyos na si alyas Gene at bukod sa pananakit ay dinagdagan pa ng masasakit na salita na lalong nagpahina sa biktima.
Sa report nina P/SSgt. Diego Ngippol at P/SSgt. Bengie Nalogoc kay Malabon police chief P/Col. Jay Baybayan, naganap ang insidente bandang 1:20 ng madaling araw sa l;oob ng bahay ng biktima sa Block 45, Lot 8, Brgy. Longos.
Ayon sa report, umuwi ang lasing na suspek para kumain nang bigla umanong nag-init ang ulo nang makitang walang makain sa kanilang mesa at agad na nagmumura at sinaktan ang sariling ina na natutulog ng mga oras na iyon.
Agad namang nakahingi ng tulong sa Malabon Police Sub-Station-5 ang matanda kaya’t mabilis na rumesponde sina P/Msgt. Marvin Monzaga, P/SSgt. Joselito Inocencio at Patrolman John Cadric Goque kaya nahuli ang patakas sanang suspek.
Dinala sa Caloocan City Medical Center ang matanda para mabigyang lunas sa mga tinamong sugat sa ulo at katawan.
Kasalukuyang nakakulong ang suspek habang pinag-iisipan pa umano ng ina kung sasampahan ng kaso ang anak.
