Hindi magkaugaga ang isang British national matapos maaktuhan na nagwi-withdraw gamit ang iba’t ibang hawak na ATM cards sa isang bangko sa Ermita, Maynila, kamakalawa ng gabi.
Nitong Lunes ay naaktuhan ng isang security guard na nagpapatrolya sa paligid ng isang binabantayang bangko ang hindi na pinangalanang British national na nagwi-withdraw sa ATM booth hawak ang halos 60 piraso ng ATM cards.
Sinita ng guard dahil sa kahina-hinalang kilos at agad na dinala sa Manila Police District (MPD) headquarters ang dayuhan.
Nagulat ang mga otoridad nang buksan ang dalang bag ng dayuhan at tumambad sa kanila ang halos 400 piraso ng iba’t ibang ATM cards ng iba’t-ibang bangko.
Nabatid na hindi pangalan ng dayuhan ang nakalagay sa mga cards.
Base sa ulat ng General Assignment and Investigation Section ng Manila Police District (GAIS-MPD), nasita na noong Setyembre 27 ang dayuhan unang sitahin ng security guard dahil sa kahina-hinala nitong kilos sa loob ng ATM booth na dis-oras ng gabi ang ginawang pagwithdraw
Ayon kay PMaj. Philipp Ines, itinatanggi ng dayuhan kung saan nanggaling ang mga cards na una nang sinabi na pinapahiram daw sa kanya.
“Sa pagkakaalam natin, naimpormahan ito nung nasabing bangko at base na rin dun sa report na natanggap natin, ipagbibigay alam nila kung sino man ‘yung naapektuhan nito,” dagdag ni PMaj. Ines.
Nakapagpiyansa na ng Miyerkoles ang suspek pero mahaharap pa rin ito sa reklamong paglabag sa Access Devices Regulation Act.
